Mashtrimi më i shtrenjtë nuk ka asnjë link
Kur flasim për phishing, mendojmë për linke dhe faqe të rreme. Por mashtrimi që u kushton bizneseve më shumë para në mbarë botën shpesh nuk ka as link, as bashkëngjitje të rrezikshme. Ka vetëm një email të besueshëm dhe një numër llogarie të ri.
Emri i tij në anglisht është Business Email Compromise (BEC). Në praktikë duket kështu:
Pse është kaq bindës
- Vjen nga një furnitor i vërtetë, ndonjëherë nga adresa e tij e vërtetë. Mashtruesit shpesh hyjnë fillimisht në email-in e furnitorit dhe lexojnë korrespondencën për javë të tëra.
- Fatura është e saktë: numri, shuma, produktet. Është fatura që po prisnit.
- Nuk ka asgjë "teknike" për të dalluar. Asnjë filtër i email-it nuk e di se IBAN-i i furnitorit tuaj ka qenë tjetër muajin e kaluar.
- Ndonjëherë adresa është pothuajse e njëjta: kompania-sh.al në vend të kompania.al, ose rn në vend të m.
Shenjat paralajmëruese
- Çdo ndryshim i të dhënave bankare të një furnitori, sado normal të duket.
- Ngutje ose fshehtësi: "paguajeni sot", "mos e telefononi kontabilistin tonë, është me pushime".
- Një bankë ose shtet tjetër, sidomos kur furnitori është vendas.
- Ndryshime të vogla në adresë ose në nënshkrim, ose përgjigje që vijnë nga një adresë tjetër nga ajo me të cilën keni folur.
- Kërkesa nga "drejtori" për një pagesë urgjente që nuk kalon nga procedura e zakonshme.
Procedura që e ndalon
Nuk ju duhet teknologji e shtrenjtë. Ju duhet një rregull që zbatohet çdo herë, pa përjashtime:
Plotësojeni me këto hapa:
- Dy persona për pagesat mbi një prag (p.sh. mbi 200.000 lekë): një e përgatit, tjetri e miraton.
- Një listë e furnitorëve me IBAN-et e verifikuara. Çdo ndryshim në listë kërkon konfirmim me telefon dhe miratim nga një person i dytë.
- Asnjë përjashtim për "urgjencat". Urgjenca është pikërisht mjeti i mashtruesit.
- Vërtetimi me dy faktorë për email-et e kompanisë, që mashtruesit të mos hyjnë dot në kutinë tuaj dhe t'u dërgojnë të njëjtin mashtrim klientëve tuaj.
- Mbrojtja e domainit tuaj me SPF, DKIM dhe DMARC, që askush të mos dërgojë email në emrin tuaj. Kontrolloni domainin tuaj falas.
Nëse keni paguar
Koha është gjithçka. Bankat ndonjëherë arrijnë ta bllokojnë një transfertë nëse lajmërohen brenda pak orësh.
- Telefononi bankën tuaj menjëherë dhe kërkoni ndalimin ose kthimin e transfertës. Kërkoni që banka të kontaktojë bankën marrëse.
- Denoncojeni në polici me të gjitha email-et (me header-at e plotë), faturat dhe të dhënat e transfertës.
- Lajmëroni furnitorin me telefon. Nëse email-i i tyre është komprometuar, edhe klientë të tjerë mund të jenë në rrezik.
- Kontrolloni email-in tuaj për rregulla përcjelljeje (forwarding) që nuk i keni krijuar ju. Është mënyra e zakonshme se si mashtruesit fshihen në një kuti postare.
- Njoftoni incidentin. Ligji nr. 25/2024 "Për sigurinë kibernetike" i lejon çdo subjekt të njoftojë vullnetarisht incidentet te CSIRT-i Kombëtar, pranë Autoritetit Kombëtar për Sigurinë Kibernetike. Për operatorët e infrastrukturave kritike dhe të rëndësishme, njoftimi është detyrim.
Ekipi juaj është kontrolli i fundit
Procedura funksionon vetëm nëse njerëzit që bëjnë pagesat e njohin mashtrimin. Kontabiliteti, financa dhe asistentët e drejtimit janë objektivi kryesor i këtij sulmi. Me Baitwise, ata mund ta përjetojnë këtë skenar në një simulim të sigurt, para se ta përjetojnë me para të vërteta. Rezervoni një demo.